NEWS

Nazirlər Kabinetinin 4 sentyabr 2019-cu il tarixli 382 nömrəli Qərarı “Sertifikat xidmətlərinin göstərilməsi, sertifikatın verilməsi və reyestrin aparılması Qaydaları”nda (bundan sonra Qərar) edilmiş dəyişikliklərin 3-cü bəndində qeyd edilən Sertifikat yeniləmə prosedurunu artıq həyata keçirmək mümkündür.

Beləliklə, “Asan İmza” sertifikatının sahibləri vergi ödəyicisinin vahid e-taxes.gov.az İnternet portalında sertifikatın müddətinin bitməsinə ən azı 30 gün qalmış, onun müddətini növbəti üç ilə onlayn qaydada yeniləyə biləcəklər. Sertifikatın müddətinin bitməsi üçün 30 gündən az vaxt qalarsa və ya Sertifikatın müddəti artıq bitmiş olarsa, vətəndaş yalnız mərkəzə fiziki olaraq yaxınlaşaraq bu proseduru həyata keçirə biləcəkdir.
Sertifikatların müddətinin onlayn uzadılması üzrə “İstifadəçi Təlimatı” ilə bu link vasitəsilə tanış ola bilərsiniz.

Həmin Qərarın 2.2-ci bəndinə əsasən sertifikatların kağız daşıyıcıda verilməsi zərurəti aradan qaldırılır və artıq istifadəçilər onlayn müraciət edərək "Şəxsi" tipli “Asan İmza” sertifikatları əsasında “Asan İmza” (Biznes tipli) sertifikatını elektron formada əldə edə bilərlər.

Qeyd etmək lazımdır ki, hal-hazırda istifadəçilər dövlət və özəl qurumların təqdim etdiyi 1000-dən çox elektron xidmətdən “Asan İmza” mobil elektron imza vasitəsilə yararlana bilir. Azərbaycan Respublikasının qanunvericiliyinə əsasən “Asan İmza” əl imzasına bərabərdir və buna görə istifadəçilərin identifikasiyası ilə bağlı bütün prosedurlara, təhlükəsizliyin təmin edilməsi, kriptoqrafiyanın bütün dünya standartlarına uyğunluğuna həm istifadəçilərin, həm də xidmət təchizatçılarının maraqlarının təmin edilməsi baxımından ciddi şəkildə riayət olunur. Belə ki, “Asan İmza”nın təqdim edilməsi proseduru şəxsiyyəti təsdiq edən istənilən digər sənədin verilməsi kimi qanunvericiliklə ciddi şəkildə tənzimlənir.

Mənbə keçidi: “Asan İmza” sertifikatlarının müddətini artıq onlayn uzatmaq mümkündür